JANUARI 2022
Perintah Sarawak Perintah Inklusif, Nadai Rayat Ditinggal Ngasaika Pemansang
KUCHING: Perintah Sarawak dipegai Gabungan Parti Sarawak (GPS) perintah ti inklusfif nentuka nadai rayat enda ngira bansa bela ampit ngasaika pemansang.
Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya enggau nya meri jaku terima kasih ngagai sukung rayat lebih agi raban bansa China ti agi mengkang ngandalka GPS megai nengeri Sarawak.
“Aku ke nyadi tuai ba perintah GPS meri jaku terima kasih ngagai rayat ti sekali agi ngelempaika tanggungpengawa ngagai GPS nyadi perintah nengeri ba kandang lima taun tu.
“Aku mega meri jaku terima kasih besai lebih agi ngagai bala kaban kitai bansa China ke udah ngenyit meri sukung ngagai pegai GPS lalu semaya aku mai raban bansa China bela megai perintah ukai semaya balang alai kitai udah nyiri Dato Sri Prof. Dr. Sim Kui Hian nyadi Sapit Kepala Menteri,” pia ku iya ba jaku beserimbai enggau Taun Baru China 2022, kena Hari Satu.
Kepala Menteri mega madah, Perintah GPS udah ngayanka pemujur ngagai rayat nyadi perintah ti ransing gawa enggau juluk ati deka ngemansangka pekara rama enggau ekonomi ti tegap.
Ku iya, iya deka naka alah gawa ngambika ulih bejadi peminta rayat baka ke udah disemaya ba manifesto lalu nentuka nengeri tu semampai ba jalai ke engkeman ngelawa tuju nyadi nengeri mansang manggai taun 2030 bepelasarka Pelin Pemansang Udah COVID-19 (PCDS) 2030.
Nambahka jaku iya, Kepala Menteri madah, taja Sarawak diatu udah ba Pelin Nyuman Menua (PPN) Renggat 4, rayat Sarawak mengkang ditangkan nyaga pengelikun diri dikena nyeliah kes COVID-19 nambah lebih agi maya Taun Baru China ke deka disambut enda lama agi.
“Taja enda baka selama tang aku ngarapka Taun Baru China taun tu diintu diri sebilik enggau rami lebih agi sida ke lama udah enda pulai ke menua ketegal atur mindah betagang (PKP).
“Ngarapka Taun Rimau tu mai pengelantang, pengering ba penyerakup, pengerai ke manah sereta pemerani napi penanggul maya pandemik,” ku iya madah baru. -EDISI UKAS
Sumber dari : UKAS